Ky është personi që u arrestua si i dyshuar për vrasjen e dy vëllezërve në Malishevë

Pas vrasjes së dy vëllezërve sot në Plloqicë të Malishevës, është arrestuar një person.

Lajmin për arrestimin e tij e ka konfirmuar prokurori i Prokurorisë Themelore në Gjakovë Agron Matjani.

Matjani tha se i arrestuari Blerim Maloku është po nga fshati Plloqicë.

“Policia ka arrestuar Blerim Maloku nga po i njëjti fshat me dy viktimat e rastit”, tha prokurori Matjani.

Ndërsa i pyetur për motivet e rastit, ai tha se ende mbetën të pasqaruara, duke shtuar se policia po punon në ndriçimin sa më të shpejt të këtij rasti.

Ndërkohë “Gazeta Blic” nga burime të saja mëson se i arrestuari është kushëri i dy viktimave Bahri Maloku dhe Shani Maloku, ky i fundit pjesëtar i FSK-së.